Ang pinakamasarap pala sa isang reporter ay yung matsambahan mo ang aktuwal na insidente, dahil ika nga nila, eksklusibo o scoop. Nangyari kasi sa amin ito nung kasama kong buraot, pero huwag muna kayong malito ha, hindi kami mga reporter. Ganito ang nangyari, inabot kasi kami ng gutom nung kasama ko kaya naisipan na rin muna naming chumibog. Nung lumalapa na kami ay bigla kaming nakarinig ng isang malakas na tunog. Ang unang inakala namin ay baka may nataob lang na tray na may lamang pagkain. Pero nung matapos ang kaguluhan ay napuna naming bumagsak pala yung kisame nung kainan. Mabuti naman at papaalis na yung tatlong babae na nakaupo sa pinangyarihan ng insidente. Mabilis agad ang sumunod na pangyayari, pumapel agad ang manager nung kainan at inatasan ang mga crew nila na linisin ang mga kalat. Kasunod nito ay pinasara na sa security guard yung kainan at ayaw na munang magpapasok. Habang nililinis nung mga crew nila ang kalat ay bigla na namang bumagsak ang isang bahagi nung kisame na gawa lang pala sa lawanit. Joskopo, buti na lang at tapos na ang oras ng tanghalian, kasi kung nangyari ito sa kasagsagan ng tanghalian, malamang ang daming nabagsakan na mga bata dito. Paborito pa naman ng mga bata ang nasabing kainan na ito na one to sawa ang gravy, kaya puede mo nang isabaw dun sa kanin mo ang masarap nilang gravy.
0 comments:
Post a Comment