Charub

Sa wakas nakakain na rin ako sa Steak MD. Una ko itong napansin nung minsang mailagay sila sa isang magazine na may topic tungkol sa chibug. Siguro dalawang taon na rin yun nung mabasa ko sila dun sa magazine na ano, yung ano ba, yung FHM (nahihiya pa kunyari). Hindi ko lang masyadong binigyan ng pansin (mas marami kasi yung pikyur nung mga babae dun sa magazine). Kasi kapag nabasa mo na agad yung salitang "steak", tapos sa Tomas Morato pa nakapuwesto yung kainan, isa lang ang ibig sabihin nun, MAHAL JAN. Kaya nung minsang nagka-usap kami ni Jun D. (ang legal na tulak ng Q.C), ay nabanggit nya sa akin ang Steak MD. Nirekumenda niya sa akin ito dahil masarap daw at mura pa. May phobie, phobvia, phomela baranda, phophoy, ah basta, may takot kasi ako sa mga kainan jan sa Tomas Morato. Ang tingin ko ba lahat sa kainan jan ay kailangan kong magtapon ng thousand thousasses para lang masubukan ko ang mga kainan diyan. Kaya nung banggitin sa akin ni Jun D. na mura lang ang chibug sa Steak MD ay hindi ko na hinintay na maaprubahan ang loan ko sa GSIS, pumunta na agad ako doon at sinubok ang pinagmamalaki niyang kainan. Ang inorder ko dun ay yung 333g na PRTHS (Porterhouse ogags, pinaigsi ko lang) na Butter Rub Thick (ikaw kasi ang pipili kung anong timpla ang gusto mo), samantalang yung buraot na kasama ko ay T. Bone naman na niluto ChaRub style (manamis namis na maanghang anghang). Halos hindi ko pa naibubulsa yung astray nila ay dumating na yung order namin. Sa hitsura pa lang ay mukhang masarap na kaya hindi na ako nagpatumpik tumpik pa, huminga lang ako ng malalim sabay pikit sandali at nag thank you Lord, sabay attttttackkkk. Masarap ang timpla at malambot talaga ang steak nila. Dalawa nga ang order naming kanin, pero pinakansel ko agad yung isa, kasi mahina naman kami sa kanin kaya kasya na yung isang order sa amin. Tinanong ko nga yung waiter na babae kung meron silang pandelimon, kasi mas type kong kumain ng steak na ang katerno ay tinapay kesa kanin o kaya ay yung sidings lang na "smash potato", ooops bago nyo ko korekin, alam kong "mashed potato" lang ang tawag doon, kaya lang ay may kaibigan ako na "smashed potato" ang tawag dun, kasi dinudurog daw iyon kapag lulutuin, getching mo na. BTW, sa dinami dami ng nakainan kong mga resto na nagbebenta ng steak o mukhang inisteak, isa itong Steak MD na may appeal agad sa akin, kahit first time kung nakalaklak doon. Masarap kasi talaga ang timpla nila at...ah basta masarap, hindi ko maideskrayb kung ano yung nadama ko nung unang subo ko nung steak nila. Pero isa lang ang napuna ko, mukhang kulang pa yata sa tubig yung kanin nyo, kasi medyo matigas pa. Ang Steak MD ay makikita nyo nga pala dun sa side ng Tomas "Murato" (mura dito), malapit na dun sa outpost ng mga MMDA na laging nanghuhuli, wala akong sinabing nangongotong ha, bastos.