king of pain

Nampucha hindi ako pinatulog nung buset na pamamaga nung hinlalaki sa paa ko. Nagresearch ako sa internet kung ano ang tawag dito. Isa lang ang pinakamalapit na puedeng maging tawag sa pamamaga ng hinlalaki ko, ito yung GOUT, isang klase ng arthritis na madalas ay nakakaramdam ka ng pananakit sa iyong hinlalaki. Nakukuha raw ito sa sobrang pagkain (liver, gravy, seafood etc) at sa sobrang pag inom ng alak o serbesa. Uric acid daw ito, na sumobra sa katawan natin, at hindi mailabas kaya kung minsan ay sumisiksik sa mga pagitan ng mga buto natin. Bigla tuloy akong nagflashback kung ano ba ang mga nakain ko nung nakaraang araw. Last Friday, nasa Steak MD ako at lumaklak ng Porterhouse na isinawsaw sa gravy. Nung gabi naman ay bumira ako ng ilang boteng malamig na serbesa at inihaw na bangus. Sabado? nag-ihaw ako ng liempo nung tanghali na isinawsaw sa gravy, may kaunti rin akong aligi ng talangka na pangontra sa malamig na serbesa. Nung gabi naman ay nag-ihaw kami ng ulo at tiyan ng blue marlin habang lumalaklak ng serbesa. Linggo ay nagtiis muna ako sa bulalo dahil matagal na rin akong hindi nakakakain nito. Nung gabi naman ay bumira kami ng serbesa. Lunes ay kumain ako ng T-Bone steak sa Snackaroo, lubog din sa gravy ang steak nila, nung gabi ay bumira ako ng serbesang malamig. Martes ay may nag-aya naman sa akin sa Jollibee, lumantak kami ng tig dalawang chicken joy na isinawsaw na naman sa gravy. Nung gabi ay tumira ako ng ilang boteng malamig na serbesa. Miyerkules naman ay bumira kami ng sashimi, chicken, beef with broccoli, mixed vegetables at sankaterbang serbesa, birthday kasi ni bossing (medyo maga na ang talampakan ko nito). Huwebes ay nasa JT's Manukan naman kami at bumira ng inihaw na manok, batikolon (inihaw na laman loob ng manok-yan pa naman ang bawal na bawal sa gout) at Lapaz batchoy na puro laman loob din ang sahog. Kaya heto ako ngayon, wala pang tulog dahil sa buset na gout na yan. Nung nirerebyu ko ang mga nakain at nainom ko nitong nakaraang isang linggo, isa lang ang alam kong dapat iwasan para hindi ako madale ng gout, iwasan ko yung gravy.