Ok, just a little pinprick

Totoo palang may himala, pero hindi si Judiel Nieva o si Ate Guy ang tinutukoy ko. May himala kasing nangyari sa akin ngayon habang papunta ako sa doktor. Tama kayo mga buset, hindi pa rin nawawala ang maga ng paa o kung tawagin ng mga medical practitioner ay gouty arthritis. Pero bago kayo magsitawa, hindi ito sakit ng mga tumatanda dahil bata pa naman ako. Pangmayamang (pero hindi ko sinabing mayaman ako ha) sakit ito, nakukuha ito sa pagkain ng red meat (steak), seafood (sashimi) at alak. Kaya kahit magpunta ka sa doktor ay hindi nakakahiyang komunsulta. Ang nakakatuwa lang ay nung papalapit na ako sa pagamutan, para nga ikonsulta yung lintek na pamamaga ng paa ko. All of a sudden ay biglang nawala ang pamamaga at kirot. Hindi naman ako takot pumunta sa doktor, pero bakit kaya biglang nawala yung sakit. Handa naman akong magbigay ng donation, kahit ba sabihing sampung piso lang ang donation sa pagpapagamot kay Dok, ok lang sa akin iyon, i can manage. Pero nandoon na rin lang naman ako sa klinika at nailista na rin naman ang pangalan ko nung medical assitant ni Dok, minabuti ko na ring magpatingin. Ayun iisa ang findings namin, gout nga ang nakadale sa akin. Kinuhanan na rin niya ako ng kaunting dugo, sabi pa nga ni Dok, "bakit nagkawala ang ugat mo, kinakabahan ka ba?". Ano kala mo sa akin duwag, nakikipahabulan nga ako ng saksakan sa looban namin, tapos maliit na heringgilya lang ay tatakutin mo ako. Pero kailangan bang kuhanan talaga ako ng dugo, puede bang sa isang taon na lang, babalik ako promise. Mabuti na lang at kakosa ko yung doktor, matapos niya akong itali sa kama at pahawakan sa apat na medical assitant niya, ay nakuhanan din niya ako ng dugo. Puwera pa dito yung nasipa kong lampshade at yung isinuka kong agahan, kasi naman ay pinipilit nila akong kuhanan ng dugo, kaya ko namang gawing mag-isa yun, pero sa isang taon nga lang, promise. Matapos makunbinsi ni Dok na pabalikin yung ibang pasyente na nagtakbuhan palabas ng klinik, dahil na rin sa lakas ng palahaw ko nung kinukuhanan ako ng dugo ay binigyan na niya ako ng reseta. Mabuti na lang at wala siyang ibinawal, lalo na yung... yun bang ano... buti na lang hindi niya ko binawalan na mag ano, yung bang mag ano....yung... (medyo shy) uminon ng serbesa. Kasi kung binawalan niya akong uminom ng serbesa, sisiguraduhin ko sa kanya na huling punta ko na doon, kuhanan man niya ako ng dugo o hindi.